Fara í efni

BITRI, SORRY, BLÁMI

Litli puttalingur kreppuþjáðs leiðsagnarflokks hægriafla á Íslandi er Árni Sigfússon, sá sem hraktist úr pólitík í Reykjavík um árið. Suður með sjó hefur verið völlur á kappanum, sem áður féll. Endurreistur hefur um skeið náð að skuldsetja Reykjanesbæ glæsilega. Eftir brotthvarf hersins hafa fjögur málefni verið Árna hugstæð:

1)Ævintýrabrask með gamlar hereignir.

2)Skipulag og bygging íbúðarhverfa á bólutímanum, sem skapaði tímabundin verktakastörf, en voru samt glórulaus aðgerð til lengri tíma litið.

3) Álverksmiðjudraumur í Helguvík, hugsanlega rafmagnslaus.

4) Brask með eignir Hitaveitu Suðurnesja, sem nú gæti endað með því að orkuauðlindir komist í eigu erlendra fjárfesta.

Skammt er síðan íslensk braskaragengi og taglhnýtingar þeirra í pólitík, töldu afar arðvænlegan kost að kaupa upp orkulindir og orkufyrirtæki fólks í Filipseyjum! Þar var ríkisstjórn í fjárhagsvanda og þann vanda ætluðu íslenskir úlfar að notfæra sér. Óskaplega margar skriljónir átti að græða á Filipseyjum og var aðgerðin hugsuð í samfloti með alþjóðlegri hjörð hrægamma.
Nú rennur fossinn uppímót. Ísland er hugsað sem veislukostur hrægamma. Nú skal selja þeim orkulindir þjóðar fyrir tombóluprís, Árni og íhaldsvinir eru meðal áköfustu sölumanna. Salan er  á gráu lagasvæði til skúffufyrirtækis alþjóðfjárfesta, Magma.
Hermang var í eina tíð ær og kýr gamla, sorry bláma. Grátur varð þegar bandaríska drápsvélin hrökklaðist á brott vegna kostnaðar og anna við manndráp í Írak.
NATO hefur fengið nýtt hlutverk, nýjan orustuvöll: Alla veröldina. Nú skal herjað á orkurík Mið Austurlönd. Brátt verður NATO á fullu í S.-Ameríku, um sunnanverða Afríku og auðvitað verður byssum beitt í Afganistan um ókomin ár. Öll stríð hafa frið sem markmið er sagt. Í þeim skilningi er NATO ,,friðarbandalag" vestrænna stórvelda. Hernaðarfriður NATO er yfirráðafriður, stríðsógnarfriður,kjarnorkufriður.
Buttalingurinn Árni er vel á veraldarvaktinni. Nú er kappsmál hans að lokka til Vallarins einkarekið stríðsfyrirtæki sem vill á Íslandi þjálfa hermenn til manndrápa víðs vegar um veröldina. Gamlar rússneskar herþotur eiga að verða fyrstu leiktæki lærlinganna, enginn veit hvaða tæki síðar fylgja. 
Leiguliðafyrirtækið þykist tengja sig við NA´TO umfram aðrar stríðsvélar, en það starfar þó í frjálsu markaðsumhverfi í manndrápaiðju heimsins. Þannig fyrirtæki þrífast á ógæfumálefnum mannkynsins, sölufyrirtæki dauða og þjáninga.
Ekkert nágrannaríki Íslands getur verið þekkt fyrir að þjóna siðlausum viðskiptahugmyndum stríðsmangarafyrirtækis af þessu tagi. Allt hefur sín takmörk ! Árni puttalingur skilur ekki slík siðamörk. Hann sér pening í stríðsmangi.
Gamli sorry blámi, íhaldsflokkurinn, á skammt eftir ólifað. Bláminn spilar bara gamlar plötur en veit ekki að það bjarmar fyrir nýjum tímum nýrra kynslóða á  Íslandí

Baldur Andrésson