NIÐURSTÖÐUR AFBAKAÐAR
Birtist í helgarblaði Morgunblaðsins 05/06.09.26.
að var skynsamleg ákvörðun fyrr á árinu að leggja tillögu um Bókun 35 með EES samningnum til hliðar. Ef niðurstaðan í þjóðaratkvæðagreiðslunni hefði leitt til aðildarviðræðna við ESB og í kjölfarið aðildar hefði bókunin þar með verið úr sögunni því við hefðum þá undirgengist úrskurðarvald Evrópusambandsins að öllu leyti.
En niðurstaðan varð ekki þessi. Meirihlutinn hafnaði því að ganga lengra inn undir stjórnkerfi ESB og þar með dómsvald.
Þá bregður svo við að valkyrjurnar þrjár eins þær stundum kalla sig boða blaðamannafund og segja að þjóðin hafi í reynd verið að biðja um nánara samstarf við Evrópusambandið á forsendum samningsins um hið Evrópska efnahagssvæði og þær ætli að byrja á því að bregðast við þessu ákalli með lögleiðingu Bókunar 35!
Spurningin sem þjóðin svaraði var þessi: „Á Ísland að hefja á ný aðildarviðræður við Evrópusambandið?“ Hvergi var minnst á EES hvað þá hernaðarsamvinnu sem utanríkisráðherra sagði augljóst að þjóðin hefði viljað efla til muna!
Vissulega kom það viðhorf skýrt fram í umræðunni að við hefðum það sem við þyrftum með EES samningnum, aðgang að markaðssvæði Evrópu og samstarf á ýmsum sviðum.
Jafnframt kom þó fram að ýmsir töldu EES samninginn hafa þrengt að lýðræðinu og að með honum hefði gróðakrumlunni verið hleypt of nærri innviðum samfélagsins.
Í helgarpistli á þessum stað í þessu blaði sagði ég 31. maí síðastliðinn svo dæmi sé tekið: “Með EES samningnum var gerð málamiðlun sem gekk of langt í fullveldisafsali að mínu mati. Nú þegar heimtað er að gengið verði enn þá lengra í þessa átt segi ég nei og vonast til þess að flestir geri slíkt hið sama.”
Umræðan í aðdraganda þjóðaratkvæðagreiðslunnar hafði ýmsa kosti í för með sér. Eftir því sem á leið var farið að kafa eftir skilningi á stjórnkerfi Evrópusambandsins og komu margir þá auga á að dómstól Evrópusambandsins í Lúxemborg er beinlínis gert að stuðla að meiri samruna innan sambandsins með úrskurðum sínum - sem oftar en ekki eru í þágu markaðsafla - og þvinga öll aðildarríkin undir sameiginlegan lagaskilning ESB.
Stjórnartillagan um Bókun 35 myndi færa okkur enn lengra undir þetta verklag en við þó þurfum að sæta því að með lögleiðingu hennar tekur hún af íslenskum dómstólum svigrúm sem þeir þó hafa til þess að hafa áhrif á landamæri dómsvalds ESB og Íslands þar sem markalínur eru óskýrar.
Vorum við að biðja um að þrengt yrði að þessu svigrúmi eða það að engu gert?
Hver svari fyrir sig.
---------------------------------------
Athygli er vakin á því að hægt er að gerast áskrifandi að fréttabréfi þessarar heimasíðu á slóð sem hér er að finna: https://www.ogmundur.is/
Fréttabréfið er sent aðeins endrum og eins til áskrifenda þeim að kostnaðarlausu að sjálfsögðu.
Here you can subscribe to a newsletter from this homepage, free of charge of course: https://www.ogmundur.is/
(Ábending: Margir þeirra sem hafa viljað skrá sig á útsendingarlista fréttabréfsins hafa orðið fyrir því að fá ekkert viðbragð eftir skráningu. Skýringin hefur oftar en ekki verið sú pósturinn hefur hafnað í ruslpósti. Fólk gæti að þessu.
To be taken note of: Sometimes people who have wanted to subscribe to the news-letter (by pressing skrá netfang and by then giving their e-mail, netfangið þitt) have not got any confirmation. Usually this is because the reply has been directed to the trash bin. Be aware of this.)