Fara í efni

RÍKISÚTVARPIÐ KOMIÐ Á RANNSÓKNARBUXUR?


Nýlega sótti ég ráðstefnu um samgöngumál í Mexíkó. Ráðstefnuna sótti ég ásamt starfsmönnum Vegagerðarinnar og einum starfsmanni Innanríkisráðuneytisins. Frá þessari ráðstefnu var ítarlega greint á vefsíðu ráðuneytisins og í ýmsum fjölmiðlum. Ekki er mér kunnugt um að Ríkisútvarpið væri í þeim hópi.

En fréttastofa RÚV reyndist þó ekki með öllu áhugalaus um þessa ráðstefnu. Hún vildi fá að vita hvernig á því stóð að ég hefði yfirleitt sótt þessa ráðstefnu og hvaða kostnað það hefði haft í för með sér fyrir ráðuneytið og þar með ríkissjóð að senda mig á hana. Einnig vildi Ríkisútvarpið fá að vita hvernig tryggt yrði að vitneskja sem ég kynni að hafa aflað á ráðstefnunni yrði varðveitt innan ráðuneytisnis eftir að ég hyrfi úr embætti.
Spurningar RÚV og svör við þeim voru birt á vef Innanríkisráðuneytisins. Sjá hér: http://www.innanrikisraduneyti.is/frettir/nr/27317

Ekki geri ég minnstu athugasemd við að fréttastofa RÚV vilji vita hvernig farið er með skattfé. Það er hlutverk fjölmiðla að veita aðhald. Það er helst að ég staldri við þann skilning Ríkisútvarpsins að þátttaka í alþjóðasamstarfi hljóti fyrst og fremst að byggja á því að flytja þekkingu af ráðstefnum til síns heima en virðist ekki koma auga á þann möguleika að fulltrúr séu sjálfir veitendur, taki m.ö.o. þátt í umræðu og leggi til málanna. En látum það vera.

Ég geri ekki heldur athugasemd við að Ríkisútvarpið skuli hefja rannsóknarfréttamennsku sína á mér. Einhvers staðar þarf að byrja. Fróðlegt verður að fylgjast með framhaldinu.

Hvernig væri að gefa nú skýrslu um ferðir starfsmanna Ríikisútvarpsins? Þannig mætti sýna einlægan vilja í verki. Hvernig væri að Óðinn fréttastjóri gerði grein fyrir sjálfum sér og sinna starfsmanna á undanförnu ári? Páll útvarpsstjóri mætti einnig gefa okkur skýrslu um sig og sína skrifstofu. Þetta er sagt í fullri alvöru.

Síðan væri verðugt rannsóknarefni að kanna ferðakostnað vegna ESB viðræðna, í stjórnsýslu, í  ráðuneytum, á Alþingi, í fjölmiðlum, þ.á m. RÚV.
Ríkisútvarpið hefur sagt A. Nú verður varla látið staðar numið? Eða hvað, Óðinn og Páll?