HA? AFTUR?!!!!

Íslandsbanki hefur skýrt frá því að hann sé að setja upp útibú í New York til að aðstoða fjárfesta til að komast yfir auðlindir Íslands, sjávarútveginn og orkulindirnar. Vísir.is segir svona frá: „Íslandsbanki ætlar að hasla sér völl í Bandaríkjunum með fjármálaráðgjöf við fjárfesta í sjávarútvegi og jarðvarmaorku. Til stendur að opna skrifstofu í New York og segir bankastjórinn (Birna Einarsdóttir) að ímynd Íslands í þessum geirum hafi ekki laskast þrátt fyrir bankahrun."
Allt löglegt. Eflaust. En siðlaust. Fullveldisbarátta Íslands snýst núna um að tryggja almannaeign á auðlindum þjóðarinnar. Hættan á að missa þær úr hendi hefur aldrei verið meiri, gjaldmiðillinn í lágmarki og því allt á gjafaprís, þorskurinn og fossarnir og hverirnir. Og vinnulaunin? Á niðurleið. Hver man ekki eftir bæklingi Finns Ingólfssonar um „Lowest Energy prices." Nú vill Íslandsbanki endurtaka leikinn. Þekkingin er til á Íslandi! Er það þetta sem menn eiga við með því að virkja hugvitið?
Íslandsbanki hefur notið aðstoðar skattgreiðenda. Þetta er blaut tuska í andlit þeirra. Ekki meir. Ekki meir!

Slóð á frétt Visir.is: http://www.visir.is/article/20100502/VIDSKIPTI06/178331983

Sjá skrif mín frá 1.10.07: https://www.ogmundur.is/is/greinar/islenska-no-matter-what