STJÓRNMÁLAFLOKKUM ER VANDI Á HÖNDUM Í KOMANDI KOSNINGUM Í REYKJAVÍK
Enn eina ferðina kemur fram skoðanakönnun sem færir okkur heim
sanninn um að yfirgnæfandi meirihluti landsmanna vill flugvöllinn
áfram í Vatnsmýrinni í Reykjavík og meirihluti Reykvíkinga er á
sama máli. Flugvöllurinn skal vera.
Á sama tíma kemur fram að flestir borgarfulltrúar eru á öndverðum
meiði við meirihlutann. ( Sjá td. hér: http://ogmundur.is/annad/nr/6806/
)Og ennfremur að allir hyggjast þessir fulltrúar bjóða sig
fram að nýju. Sumir þeirra, sem fram til þessa hafa fylgt
harðlínustefnu í málinu, tala nú mjúklega í aðdraganda prófkjöra
fyrir sátt, sem annað hvort virðist eiga að felast í því að malbika
Skerjafjörðinn eða þrengja svo að innanlandsfluginu að það verði
hvorki fugl né fiskur. Um það verður að sjálfsögðu aldrei nein
sátt. Ef til vill niðurstaða undir einhvejum kringumstæðum, en
engin sátt.
Í mínum huga er sú leið vænlegust að leysa
flugvallarmálið með því að efna til þjóðaratkvæðagreiðslu
um það.
Innanríkisráðherra segir skipulagsvald meirhlutans í Reykjavík eigi
að vera allsráðandi, heilagt orð sem ekki verði gengið gegn.
En svo er væntanlega til nokkuð sem heitir ábyrgð Alþingis og
ábyrgð ráðherra á samþykktum Alþingis og samgöngumálum þjóðarinnar
og svo einnig ábyrgð á undirrituðum samningum ráðherra
samgöngumála. Sl. vor var undirrritað samkomulag milli borgarinnar
og ríkisins um lokun norð-austur/suð-vestur brautar. Það samkomulag
var háð mjög skýrum og ákveðnum skilyrðum um rekstrarmöguleika
fluvallarins inn í framtíðina. Ef þau skilyrði yrðu ekki fyrir
hendi, þá væri samkomulagið úr sögunni. Þetta hefur alltaf verið
kýrskýrt, og væntanlega "heilög" skylda ráðherra að framfylgja. Eða
hvað? Við því þarf að fá svör og eftir þeim verður gengið ef þörf
krefur. ( Sjá hér: http://ogmundur.is/annad/nr/6729/
)
Ég ber virðingu fyrir fólki sem vill standa og falla með
sannfæringu sinni. Líka gegn flugvelli í Vatnsmýrinni. Ef það á
annað borð er ekki bara tilbúið að standa heldur líka falla. En
hvernig fara kjósendur að ef í forsvar stjórnmálaflokkanna og efst
á lista er sett fólk sem er staðráðið í því að beita sér gegn
meirihlutaviljanum og þá einnig gegn vilja viðkomandi kjósenda
eftir komandi kosningar?
Flokkarnir hljóta að huga að þessu við uppstillingu á lista. Og
kjósendur síðan í kjölfarið.