Fara í efni

HVER MÁ SKRIFA UM HVERN?


Styrmir Gunnarsson, ritstjóri Morgunblaðsins og innsti koppur í búri Sjálfstæðisflokksins, skrifar bók um efnahagshrunið á Íslandi. Ég er beðinn um að skrifa ritdóm um bókina. Ég tek þeirri ósk vel enda bókin áhugaverð. Ýmsar upplýsingar þar að finna sem mér þykja markverðar.

Bannað að sjá hvítan blett á andstæðingi

Í bókinni kemur fram ákveðið uppgjör við það valdakerfi sem ritstjórinn hafði verið hluti af og sett er fram róttæk sýn á lýðræðið og krafa um að þjóðfélagið verði opnað upp á gátt. Öðru vísi mér áður brá. Í ritdómi mínum nefni ég dæmi þar að lútandi.
Um allt þetta fjalla ég eftir bestu getu. Kemst að þeirri niðurstöðu að bókin sé eftirsóknarverð um margt og vel skrifuð. Á þessum forsendum hrósa ég henni.
Ha, hvað er að gerast, er þingmaður VG að hrósa fyrrum ritstjóra Morgunblaðsins? Af þessu sprettur þó nokkur umræða á netinu. Ekki um bókina eða ritdóm minn. Nei, um þá staðreynd að ég sé yfirleitt að skrifa ritdóm um bók eftir þennan tiltekna höfund og það sem verra er - að ég skuli yfirleitt sjá á honum hvítan blett. Slíkt hlýtur að teljast daður við Sjálfstæðisflokkinn og hljóti ég að vera hallur undir þann stjórnmálaflokk! Kannski er ég að reyna að koma á ríkisstjórn VG og Sjálfstæðisflokks? Þeir sem þekkja til innri sögu þeirra flokka og hreyfinga þar sem ég hef haft pólitíska búsetu, vita sem er, að aldrei hef ég verið í þeim hópi sem hvatt hefur til stjórnarsamstarfs við Sjálfstæðisflokkinn. Þvert á móti!

Þegar  Sjálfstæðisflokkurinn er pólitískur kærasti

Merkilegast er að sjá og heyra vandlætingartalið frá þeim sem sjálfir hafa verið í pólitískri sambúð með Sjálfstæðisflokknum. Þá var hann bara fínn, eða hvað? Og þá væntanlega í góðu lagi að skrifa ritdóma um bækur úr þeirri áttinni. 
Hvernig væri að reyna að hefja umræðu í landinu yfir karp og meting á milli pólitískra kirkjudeilda og ræða þess í stað um málefni?
Það er náttúrlega erfiðara að taka afstöðu til bókar og ritdóms um hana en að fella pólitíska palladóma um höfund og ritrýni. Það er erfiðara vegna þess að þá þurfa menn að hafa fyrir því að kynna sér málin.

---------------------------------------------------------------
Fjörug umræða á eyjunni,is (þakka vinsamleg ummæli): http://ordid.eyjan.is/2009/12/04/ogmundur-hrosar-bok-styrmis/#comments