FYRIR HVERJA STENDUR FRÉTTASTOFA RÚV VAKTINA?
Fréttastofa RÚV ohf þóttist heldur betur komin í feitt um
helgina. Borgarfulltrúi hafði sent út upplýsingapakka um niðurskurð
Reykjavíkurborgar á fjárframlögum til unglingasmiðja í borginni.
Borgarfulltrúinn, Þorleifur Gunnlaugsson, hafði fengið leyfi stúlku
sem bar hag þessarar starfsemi fyrir brjósti, til að senda með í
pakkanum ákall hennar gegn niðurskurðinum. Þetta gerði Þorleifur.
Hann strokaði út nafn stúlkunnar, sem var undir bréfi hennar, og
sendi á fréttastofurnar. Eitt yfirsást honum. Í bréfinu sjálfu var
að finna nafn stúlkunnar. Þorleifur skrifaði fréttastofunum að nýju
og bað þær um að virða nafnleynd stúlkunnar og sýna málinu
nærgætni.
Það gerðu fréttastofurnar. Framan af allar nema fréttastofa RÚV.
Hún birti að vísu ekki nafn stúlkunnar. Fannst hún hins vegar
hafa komist í feitt og blés það út að borgarfulltrúi hefði birt
bréf í leyfisleysi! Stórfrétt. Eða hvað?
Hagsmuni hverra skyldi fréttastofan telja sig vera að gæta?
Stúlkunnar sem er að berjast gegn niðurskurði eða þeirra sem vilja
drepa umræðu um niðurskurðinn á dreif? Aðrir fjölmiðlar viku einnig
að málinu, fóru í kjölfar RÚV, einkum netmiðlarnir sjá
http://eyjan.is/blog/2008/12/13/borgarfulltrui-vinstri-graenna-sendi-vidkvaemar-trunadarupplysingar-um-unga-stulku-til-fjolmidla/
Við þetta vakna ýmsar spurningar. Er virkilega ekki hægt að ræða
við fréttastofur á mannlegum nótum? Þegar augljós mistök verða -
handvömm - hví ekki taka tillit til þess? Engum fjölmiðli kom
til hugar að birta nafn stúlkunnar. Engum kom til hugar að gera sér
mat úr þessu nema fréttastofu hljóðvarps. Sjá ágæta frásögn hér: http://soley.blog.is/blog/soley/entry/744318/
Önnur spurning snýr að rétti stúlkunnar. Hvers vegna að gera það
mál nánast totryggilegt - að felumáli - þegar kröftugur
einstaklingur eins og stúlkan, eldfklár og með sterka
réttlætiskennd, rís upp og segir skoðanir sínar. Sjálfum finnst mér
viðkomandi einstaklingur aðdáunarverður.
Ekki svo að skilja að það á að sjálfsögðu að vera hennar að ákveða
hvort og hvenær nafn hennar birtist. En mærðarvellan sem flóði um
alla netmiðlana var með ólíkindum þótt verstar væru fréttir RÚV:
Forræðishyggja í dularklæðum mannréttinda.
Þorleifur Gunnlaugsson, borgarfulltrúi, sýndi allan tímann hógværð
og kurteisi. Baðst afsökunar fyrir mistök sín. Á þessu var reyndar
hamrað í fréttum RÚV. En hvar er afsökunarbeiðni fréttastofu RÚV
gagnvart fólki sem greinilega var misboðið, samanber yfirlýsingu
sem fjölskylda stúlkunnar og hún sjálf birti eftir að tíundað var í
Ríkisútvarpinu ohf að borgarfulltrúinn hefði beðist afsökunar. Í
yfirlýsingu fjölskyldunnar kemur fram að borgarfulltrúinn hafði
aflað allra tilskilinna leyfa þótt honum hefðu orðið á mistök sem
hann reyndi að leiðrétta og fjölskyldan hafði fullan skilning
á.
sbr. http://smugan.is/frettir/frettir/nr/360