VAÐLAGÖNG Í SKRÍPAUMGERÐ

Stjónarhættir á Íslandi kalla stundum fram hreinar delluafurðir. Ein slík er umbúnaður Vaðlaheiðarganga,7.5km rándýra búts af þjóðvegakerfinu, sem allur er kostaður með almannafé og ætti því að teljast óskipt þjóðareign. Að sjálfsögðu í almannaeigu.
Furðuklúbbur, í raun skúffufélag að hluta í eigu stórfyrirtækja, Greið Leið, þykist fara með ráðandi 61% hlut í öðru tilgerðarfélagi VHG hf. Það félag er skráður “ einkaeigandi” þessa afmarkaða 7.5 km dýrasta búts yfir 1300 km Hringvegar 1. Búturinn þó kostaður af ríkinu, settur undir ábyrgð þess.( Vaðlaheiðargöng eru hvorki einkaframkvæmd VHG hf, né “PPP framtak”, enda hefur VHG hf engu kostað til að teljast “eigandi” ).
Umrædd einstæð skilgreining á þessum afmarkaða, stutta en dýrasta bút Hringvegar 1, á sér rætur í gömlum vilja til þess að hann yrði viðskiptaleikfang einkafjárfesta. Sú draumsýn varð að engu, en veik von blundar um að hún raungerist síðar, þótt slíkt megi teljast útilokað nú.
Fíflaleg, einstæð og órökrétt er því umgerð Vaðlaheiðarganga í formi einkaeignar skúffufélagsins VHG hf, sem í raun ætti enga aðild að eiga sem “ eigandi” eða “ábyrgðartaki” á vegamannvirki, kostað með almannafé úr ríkissjóði, rekið á ríkisábyrgð.
Hluti af ofanlýstum absúrdleik er skráður skuldabagginn á skúffu- viðrinið VHG hf, sem nú vex að líkum vel í átt að 19 milljörðum, þótt slíkt sé pukurmál hið mesta. Skúffan sú sem er auðvitað ógjaldbær, er í krísu. Ásett, sérstæða umgerðin um Vaðlaheiðargöng, á sér enga hliðstæðu hérlendis né erlendis, ef horft er til vega-innviða. Slík er rökleysan að baki, absúrd umgerðin. Hún helst þó enn við lýði í krafti skammarþöggunar um málavexti, málefnið er afar viðkvæmt íslensku stjórnkerfi, ásýnd þess fyrr og nú.
Áður áttu Vaðlaheiðargöng að verða lýsandi fordæmi um vega-brask á vegum einkafjárfesta. Sú hugmynd fór í það skötulíki, sem alkunna ætti að vera, en er þó reynt að fela með skollabrögðum í bland við skammarþöggun.
Mál er að linni þeim dæmafáa fíflagangi með rætur í eldri ruglanda um einkabrask með útvalda stofna almannavega.