Frá lesendum

...Þú segir í greininni að nauðgun sé ofbeldi og tengir það beint við umræddan leik. Leikurinn er ógeðslegur og það er sláandi að svona leikir skuli vera til, en það er ekki hægt að setja samasem merki milli sýndarleiks og raunverulegs kynferðislegs ofbeldis. Mér finnst undarlegt að ég þurfi að benda þér á að þegar menn spila leikinn RapeLay þá er það ekki raunveruleikinn, alveg eins og skotleikir er ekki raunveruleikinn. Við tilkynnum ekki lögreglunni ef við verðum varir við tölvuleiki á netinu þar sem fólk er skotið til bana vegna þess að þetta eru einmitt "leikir".
Þótt mér og þér þyki einhverjir tölvuleikir með eindæmum ógeðslegir getum við ekki farið fram á að það verði sett í lög að banna þá. Það er ekki okkar að ákveða. Um leið og ofbeldi verður raunverulegt þá er hægt að grípa í taumana...
Björn Björnsson

...Vel má vera að VG og Framsóknarflokkurinn standi nú frammi fyrir uppgjöri í röðum stuðningamanna sinna fyrir þá sök eina, að forystumennirnir komu flokkum sínum ekki í ríkisstjórn, hvorki til hægri né vinstri. Það uppgjör bíður þá nýs dags. Mér býður hins vegar í grun, að það uppgjör gæti orðið hjóm eitt, borið saman við þau átakaefni, sem lúra í vatnsskorpu stjórnarsáttmálans, að ekki sé talað um það apalhraun stjórnmálanna, sem Samfylkingin er, og uppgjör formannanna, sem frestað var með yfirlýsingu um sátt og samlyndi sem hengd var upp í strætóskýlum í Reykjavík mánuði fyrir kosningar. Ég sá að fyrrum samstarfsmaður núverandi iðnaðarráðherra túlkaði ...
Stafán

Myndirnar af þeim Ingibjörgu Sólrúnu, Geir okkar Haarde, T. Blair og G.W. Bush eru prýðilegar. Ég er þér þakklát fyrir að birta þetta á síðunni. Mér finnst Ingibjörg Sólrún hafa náð göngulaginu betur en Geir, sérstaklega armsveiflunum. Hann er einhvern veginn daufari, mér finnst hann skorta sömu innlifun og hún greinilega hefur fyrir stundinni. Svo er Geir náttúrlega ekki eins hljólbeinóttur og Bush. Það dregur aðeins úr líkindum með þeim. Sennilega er það hestamennskan í uppvexti. Er það ekki rétt hjá mér að George W. sé frá Texas? Cowboys? Þrátt fyrir allt þetta finnst mér Geir samt gera sig betur en George þegar þeir "taka ganginn." Hver skyldi hafa hannað...
Sunna Sara

Ég er enn við sama heygarðhornið, búinn að senda þér fyrirspurn áður og búinn að ræða þetta persónulega við Atla Gíslason. þ.e. eftirlaunalögin frá 2003... Þú sem aðrir verður að viðurkenna hverskonar mismunun þessi fjandi veldur bæði kynjaskipt, búsetuskipt og stéttskipt í þessu þjóðfélagi. Opnið nú augun, lofið þjóðinni þessu og þjóðin lofar ykkur .
Þórbergur Torfason, Hala

Þegar Blair og Bush koma saman fram til að verja Íraksstríði, svo dæmi sé tekið. Þá taka þeir ganginn, eins og sagt er í Ameríku, – ganga ákveðnum skrefum eftir rauðum dregli í takt og stilla sér svo upp við þar til gerð púlt í húsi, sem ber sama nafn og auglýsingastofa ...
Stefán

Almennt er ég mikið gefinn fyrir kossa. Í minni sveit kysstust vinir og ættingjar þegar með þeim urðu  fagnarðarfundir. Þetta átti bæði við um konur og karla. Ég hef sem aðrir fylgst með samningafundum þeirra Ingibjargar Sólrúnar og Geirs Hilmars á misgengissvæðinu við Þingvallavatn. Þau virtust sammála í einu og öllu. Hvorki stóð heilbrigðisstefna Íhaldsins í Samfylkingunni né Írak og Fagra Ísland og Unga Ísland á að bíða eftir stöðugleika því eins og nýr félagsmálaráðherra segir, þá þurfa fátæk börn að gera sér grein fyrir því að það má ekki stofna til útgjalda sem setja verðbólguna í gang. Allra síst væri fátæku börnunum greiði gerður með því að efna til útgjalda...
Haffi

Það var rafmagnað andrúmsloft hjá okkur í Snotru í gær.  Ný ríkistjórn var komin til valda og Framsókn á útleið. í tilefni dagsins hafði ég sett feita bita af saltkjöti í pottinn og eftir matinn settist fjölskyldan fyrir framan sjónvarpið til að fylgjast með landsfeðurnum undirrita margboðað samkomulag. Þarna sátum við sem sé eins og  Bart Simpson fjölskyldan bandaríska í sófanum, ég, konan mín og börnin okkar tvö uppkomin. Bjart var og napurt á Þingvöllum að sögn fréttamanns, sem átti vel við augnablikið. Því næst er myndavélinni beint inn í Þingvallabæinn þar sem forsætis- og utanríksráðherrann,  sitja eins og nýgift hjón, allavega leyna sterkir og rafmagnaðir straumar milli þeirra sér ekki. Feiminn spyr forsætisráðherra...
Runki frá Snotru   

Ég sé að iðnaðarráðherra Baugsstjórnarinnar er að biðjast afsökunar á því á vefsíðu sinni að samstarfi ykkar er lokið. Skiljanlega tregablandið hjá ráðherra, sem hengdi hatt sinn og staf á snaga í ókunnugu húsi. Í húsi þar sem ekki er tekinn aðgangseyrir við innganginn. Hann greiða menn nefnilega með því að veita húsráðendum verulegan afslátt af skoðun sinni og meiningu, en umfram allt með því sem menn fallast á að gera, eða láta hafa sig útí, eins og menn nefna það afsakandi eftir á. Högninn, iðnaðarráðherrann, er meistari fléttunnar, en um hann er hægt að segja það sagt var um annan mann: Hann er mikill plottari...
Ólína

...Hefðir þú skrifað svona frétt á gamla RÚV? Þetta er reyndar dæmigert um gagnrýnislausa - eða kannski hlutdræga - fréttamennsku, sem nú tíðkast í alltof ríkum mæli. Í kvöld var sagt frá því í hinu opinbera hlutafélaqi RÚV, að SA og ASÍ tækju nýrri ríkisstjórn afar vel. Síðan var birtur viðtalsbútur við forseta ASÍ þar sem hann kvaðst "hóflega bjartsýnn" en reynslan yrði að kveða upp sinn dóm. Gefa þessi ummæli tilefni til fullyrðinga RÚV ohf.?
Gamall hippi eða ef til vill ungur, spurning um ljósár eða jafnvel ríkistjórn.

...Ég vona að við séum mörg sem bíðum eftir því að fréttaskýrendur og leiðarahöfundar taki til alvarlegrar umræðu áhrif auðmanna á opinberar umræður með auglýsingum, og með því að hafa menn í vinnu. Kannske þurfum við að bíða jafn lengi eftir umræðum um það eins og viðbrögðum við því að tugur atkvæða Íslendinga í útlöndum voru ónýtt fyrir mistök. Er það ekki álíka alvarlegt fyrir lýðræðiselskandi þjóð og ef upp kæmu 102% atkvæða úr kjörkassa í Reykjavík norður? En spá mín er sem sé sú að Björn verði ekki í Baugsstjórninni.
Ólína

...Rúsínan í karlrembuenda Ríkisútvarpsins og prófessorsins, með hliðsjón af tilboðum VG og Framsóknar til Samfylkingarinnar, er svo að flagga því að þegar stjórnarmyndunarviðræður Sjálfstæðisflokks og Samfylkingar hefjist verði Ingibjörg Sólrún Gísladóttir fyrst kvenna til að fara fyrir slíkum viðræðum íslensks stjórnmálaflokks! Ég spyr: Er til of mikils mælst að Ríkisútvarpið reyni að gera örlítið betur við landsmenn í fréttaflutningi sínum?
Þjóðólfur

Það verður mikilvægt fyrir sögu jafnaðarmannahreyfingarinnar á Norðurlöndum ef  Ingibjörgu Sólrúnu tekst að mynda stjórn undir formann Sjálfstæðisflokksins. Tímamót. Aldrei hefði Monu Sahlin dottið í hug að mynda stjórn með Moderatarna, sænska íhaldsflokknum, sem sýnir bara hvað hún hefur lítið ...
Sigurður

"Sigur"  Samfylkingarinnar var sérstaklega athyglisverður því hann var tap um 2 þingmenn og á fimmta prósent. Jón Baldvin á sök á því tapi að einhverju leyti; hann hlýtur að hafa dregið amk. 0, 2 % eða kannski meira. En talan er ekki glæsileg eða sú sama og Margrét Frímannsdóttir dró að landi 1999 og Samfylkingarfólk talaði sérstaklega illa um þá útkomu Margrétar. Og úr því að hún er nefnd á nafn: Þingmönnum Samfylkingarinnar í kjördæmi Margrétar fækkar um helming; voru 4 en eru 2 - kallar. Mest er tap  Samfylkingarinnar í atkvæðum í Reykjavík norður; tapið er 7,1 %. Minnst í Norðvestur  - kjördæmi, 2  % slétt og reyndar tapar Samfylkingin  tvisvar til þrisvar sinnum meira í þéttbýli en dreifbýli. - Sá maður sem átti að taka við formennsku af Ingibjörgu Sólrúnu ...
Sigurður

Mér finnst að VG hafi verið sjálfri sér samkvæm og ef þjóðin vill á annað borð heiðarlega stjórnmálamenn þá muni VG bara stækka og verða öflugra í framtíðinni...
Ágúst Ingi

...Hvernig bar að skilja þessi orð? Er það árangurinn í störfum forráðamanna Baugs sem eiga að ráða því hvort þeir eru dæmdir, eða ekki? Nei, lögmaðurinn getur ekki verið þeirrar skoðunar. Á að taka sérstakt tillit til landvinninga Íslendinga á Bretlandseyjum, frægð þeirra og frama, þegar þar til bærir menn taka ákvörðun um rannsókn meintra sakamála, eða þegar dómar eru kveðnir upp? Er það af þessum sökum sem Jóhannes Jónsson telur sig geta keypt sér samblástur gegn Birni Bjarnasyni? Ef skilningur manna er þessi þá eru menn í raun að tala um tvenns konar réttarfar. Kannske er hugmyndin sú, að réttast væri að setja líka sérstök refsilög sem gilda um auð- og valdamenn? Ekki bara sérstök ...
Ólína

Sú della flýgur nú fjöllunum hærra að Framsóknarflokkurinn hafi beðið afhroð í kosningunum og í framhaldinu er fullyrt að flokkurinn eigi ekkert upp á dekk í Stjórnarráðinu. Einkum hafa menn talað digurbarkalega um háðulega útreið flokksins í höfuðstaðarnefnunni Reykjavík. En hvað segir sagan okkur um atkvæðamagn Framsóknarflokksins þar í gegnum tíðina? Í þeim efnum ætti að vera treystandi á tölur Hagstofu Íslands annars vegar og Ríkisútvarpsins ohf. hins vegar og við þær er stuðst hér. Af handahófi tek ég árið 1959 sem dæmi til samanburðar við nýafstaðnar kosningar. Í alþingiskosningum í október 1959 fékk Framsóknarflokkurinn 4.100 atkvæði í höfuðstaðnum. Samanlögð atkvæði í Reykjavíkurkjördæmunum tveimur nú á dögunum voru hins vegar 4.266. Og Þetta kalla menn stórtap!! Flokkurinn hefur ...
Þjóðólfur

Nú hefur þú Ögmundur varpað fram þeirri hugmynd að við framsóknarmenn verjum minnihlutastjórn VG og Samfylkingar falli. Þetta er rausnarlega boðið en annar og miklu meira spennandi kostur er sá að þið í VG og Samfylkingunni verjið minnihlutastjórn Framsóknarflokksins falli. Það væri meira í takt við vilja þjóðarinnar og útkomu okkar framsóknarmanna í kosningunum þar sem við óneitanlega unnum góða varnarsigra víða um land nema þá kannski helst á mölinni. Hvað segir þú um þennan valkost Ögmundur, er ekki vert að ...
Jón

Ég mun að öllum líkindum veita Vinstri grænum mitt atkvæði í komandi kosningum en áður en áður en ég tek endanlega ákvörðun um það væri ég til í að heyra fra þér hvaða rök liggja að baki þess að aukin jöfnuður fáist í landinu með því að bankarnir eða önnur fjármálafyrirtæki fari úr landi. Með fyrirvara um að þessi orð þín hafi ekki verið tekin úr samhengi í fréttaflutningi...
Hlynur Páll Pálsson

...Ég vil vekja athygli á tvennu sem fram hefur komið á netinu að undanförnu. Annars vegar skrifum Sóleyjar Tómasdóttur um konur og kosningar og hins vegar skrifum Árna Þórs Sigurðssonar sem hrekja útúrsnúningaherferð Framsóknarflokksins um að VG, og þá sérstaklega þú Ögmundur, viljið reka bankana úr landi. Eftir lestur pistils Árna Þórs þarf enginn lengur að velkjast í vafa um staðreyndir máls. Ég læt hér fylgja slóðir á þessar ..
Sigríður Einarsdó.ttir

Eftir eina viku
aftur vilja á þing
þeir er sættir sviku
og selja blóm og lyng,
þeir er landið ljósa
leigja - álvers þý -
en loksins - loks skal kjósa
landi þing á ný.
...

Umræðu um eftirlaunahneykslið mun ekki slota í bráð - og ég vona sannarlega að Vinstrihreyfingin – grænt framboð kveði snimmendis upp úr með afstöðu sína í því máli þannig að eftir verði tekið – fyrir kosningar: Er VG reiðubúin að afnema eftirlaunalögin frá í desember 2003 eða breyta þeim þannig að alþingismenn og ráðherrar búi við sömu lífeyrisréttindi og aðrir opinberir starfsmenn? Ég bíð með öðrum orðum spenntur eftir svari þínu við grein minni í mbl. á laugardaginn var.
Ástæða þess að ég skrifa þér nú eru hins vegar orð Jóhönnu Sigurðardóttur í Blaðinu í dag, 8. maí. Þar er hún enn að reyna að blekkja kjósendur með því að láta líta út fyrir að ágreiningurinn um eftirlaunahneykslið snúist fyrst og fremst um ...
Hjörtur Hjartarson

...Ég óska þér og þínum velgengni í komandi kosningum. En eitt brennur á mér þar sem ér er með þér í kjördæmi: Hvernig sérð þú fyrir þér lausn á vanda Vestfjarða (sem og annarra sjávarbyggða)? Engin launung að ég ætla þér atkvæði mitt svo þetta svar ...
Fyrrum sjalli.

Varðandi framgang Bechtel í Cochabamba er kannski rétt að benda á að kröfur Aguas del Tunari (dótturfélagsins sem fékk vatnsveituna) væru verjanlegar undir þeim íslensku vatnalögum sem að óbreyttu taka gildi í nóvember. Sá ískyggilegi grunur læðist að manni að þau hafi verið sett til að gera eitthvað slíkt mögulegt. Það er algjör lífsnauðsyn að koma þessu vatnalagamáli ...
Herbert Snorrason

Ég vildi vekja athygli á yfirlýsingu frá Þjóðarhreyfingunni, því það er beðið eftir afstöðu VG til afnálífeyrisforréttinda "æðstu ráðamanna" sem voru lögfest í desember 2003: YFIRLÝSING UM AFNÁM LÍFEYRISFORRÉTTINDA Þjóðarhreyfingin – með lýðræði fagnar heitstrengingum stjórnmálamanna um afnám lífeyrisforréttinda hæstaréttardómara, ráðherra og alþingismanna. Lagasetningin frá í desember 2003 gengur gegn hugmyndum landsmanna um lýðræði og jafnrétti...
Hjörtur Hjartarson 

Mér líkaði vel að heyra samhljóminn í stjórnarandstöðunni í kjördæmaþættinum á RÚV í Suð-vesturkjördæmi í gær. Auðvitað á að gefa bæði Sjálfstæðisflokki og Framsókn frí frá stjórnarstörfum næsta kjörtímabil, ella hefði Sjálfstæðisflokkur setið í 20 ár og Framsókn í 16 ár. Svo löng valdaseta er spillandi og voru þessir flokkar þó fyrir ekki lausir við spillingu. Því fór reyndar fjarri að svo væri. Mjög fjarri. Við vitum að Framsókn vill ekkert stopp. Bara meiri völd og meiri spillingu. Ennþá nær kjötkötlunum. Ekkert stopp. Og Sjálfstæðisflokkur hefur ekki beinlínis á móti meiru af svo góðu. Sá sem...
Haffi

Er það rétt sem ég heyri frá frambjóðendum Sjálfstæðismanna að Vinstri hreyfingin grænt framboð sé alfarið á móti einkareknum menntskólum? Einnig langar mig að vita hvort Vinstri grænir mundu loka skólum eins og Menntaskólanum hraðbraut ef þeir kæmust til valda ? ...
Rúnar Örn Birgisson

...Þetta eru hugsjónir fyrir fáa sem logið er inná allan almenning, eða eru þeir margir sem hafa þegið það sem Bjarni Ármannsson hlaut frá þeim í forgjöf sem nú vilja klæðast vinnufötum utan yfir hráa helmingaskiptahugsjónina? Svei, Ögmundur, svei. Ég skora á þig að birta myndina af því þegar Finnur Ingólfsson og Ólafur Ólafsson koma glaðhlakkalegir frá því að kaupa Búnaðarbankann fyrir slikk af eftirmanni Finns í embætti iðnaðar-og viðskiptaráðherra. Það er skylda stjórnarandstöðunnar að hengja þá mynd upp eins víða og mögulegt er. Í þeirri mynd felst óréttlætið og spillingin sem hér hefur komið á, þar eru lifandi komnar “hugsjónir á vinnufötum”...
Stefán