Fara í efni

ÍSLENSK SKATTASKJÓL, ATHVÖRF OG NÁLGUNARBANN

Alls kyns ofbeldi viðgengst í okkar samfélagi. Í því sambandi skal ekki lítið gert úr því skattaofbeldi sem hér hefur lengi fengið að þrífast án nokkurra úrræða fyrir brotaþola. Í ljósi þessa er meira en einboðið að komið verði á fót íslenskum skattaskjólum og að reist verði skattaathvörf fyrir þá sem verst hafa orðið úti í glímunni við Skattmann.

Það gengur einfaldlega ekki lengur að fórnarlömb skattkerfisins þurfi að hrekjast land úr landi með sín vandamál og vera svo jafnvel kölluð siðlausir glæpamenn fyrir það eitt að leita sér aðstoðar.

Þá er mikilvægt að skoða vel hvort ekki megi setja nálgunarbann á skattyfirvöld þeim til varnar sem hafa mátt þola hreinar og beinar ofsóknir.

Við megum aldrei gleyma okkar minnstu bræðrum og systrum – og alls ekki þeim sem með ráðdeildarsemi hafa komið ár sinni vel fyrir borð.
Jobbi